ទំព័រដើម » កំណាព្យមិត្តខ្ញុំ(ស្រី) » មុនិរាជ ធីតា កំណាព្យ » លើរូបភាព » មានចំណងជើង
Category Archives: មានចំណងជើង
ផ្សងតាមដួងចន្ទ
ផ្សងតាមដួងចន្ទ
……………..
ឱ!ដួងចន្ទ កុំប្រកាន់ សូមជួយផង
អោយបំណង ដែលខ្ញុំប៉ង បានជោគជ័យ
សូមកើតកើន នូវបញ្ញា ដ៏ប្រពៃ
ជ្រើសវិថី នៃជីវិត ដែលត្រឹមត្រូវ ។
ឱ!ដួងចន្ទ កុំប្រកាន់ មេត្តាផង
សូមបន់ផ្សង ជួយរក្សា គ្រួសារពៅ
មានពុកម៉ែ មានបងប្អូន ញាតិនិត្យនៅ
ជួយជាផ្លូវ បង្ហាញសុខ ទុក្ខរលាយ ។
ឱ!ដួងចន្ទ កុំប្រកាន់ សូមសុខុម
ជាតិថ្កើនថ្កំ ហើយរុងរឿង រាស្រ្តរីករាយ
សន្តិភាព តរៀងទៅ ខ្មែរពណ្ណរាយ
ឥតទន់ជ្រាយ សាមគ្គីគ្នា គ្រប់វេលា ។
ឱ!ដួងចន្ទ កុំប្រកាន់ សូមជួបមនុស្ស
ដែលលង់លុះ ដោយចិត្តធម៌ មិនរុញរា
គូជីវិត ដែលក្នុងចិត្ត ស្មោះពុំងារ
មិនចោលគ្នា លុះអវសាន នៃជីវិត ។
ដោយ មុនីរាជ ធីតា
តម្លៃនៃមនុស្ស
តម្លៃនៃមនុស្ស
————-
មានស្នាមញញឹម សង្ឃឹមជានិច្ច
ចរិយាជាពេជ្រ រំលេចតម្លៃ
បូកផ្សំធាតុដើម ឆ្នើមហើយប៉ិនច្នៃ
ចេះប្រើសម្ដី មានន័យមិនឆ្គង។
តម្លៃនៃមនុស្ស ស្រីប្រុសទាំងឡាយ
មិនមែននៅឆ្ងាយមិនងាយនឹងឈោង
តម្លៃនៃមនុស្ស គឺមនុស្សអ្នកគ្រង
ចាប់ផ្ដើមដំបូង ដោយខ្លួនឯងផ្ទាល់ ។
សុជីវធម៍ ជាពណ៌ថ្លៃថ្នូរ
អ្នកផងគាំទ្រ រាប់រកចង់ស្គាល់
ជាអាវុធទិព្វ ជួយពេលជួបទ័ល
នេះជារឹសគល់ យល់សង្គមមនុស្ស ។
សុច្ចរិតទៀងត្រង់ សាងសង់មង្គល
ទង្វើចេះយល់ ទប់ទល់ររឿងខុស
យល់បាបយល់បុណ្យ យល់គុណយល់ទោស
មិនសាងកំហុស ខុសហើយមិនស្រាយ ។
ទោះមានចំណេះក៏ចេះគោរព
អ្នកដទៃគ្រប់ មិនអួតក្អាកក្អាយ
កុំមានទ្រព្យធន ទោរទន់សប្បាយ
មនុស្សនៅក្បែរកាយកុំមើលរំលង ។
មុនិរាជ ធីតា
អ្នកមានអ្នកក្រ មនុស្សដូចតែគ្នា បទ ពាក្យបាំបី
ម្ដេចក៏មានពៀរ តាមទាតាមស្ដី
ម្ដេចគេសុខស្រួល យើងគ្មានតម្លៃ
ម្ដេចមិនប្រណី យកកម្មដល់ណា ?
គេមានយសសក្ដិ មានប្រាក់មានដី
យើងគ្មានសូម្បី តែម្ហូបអាហារ
គេបានគ្រប់យ៉ាងដែលគេប្រាថ្នា
យើងខំយ៉ាងណា ត្រឹមបានមួយឆ្អែត ។
គេមានផ្ទះធំ សុខុមឥតភ័យ
រីយើងរាល់ថ្ងៃ ដូចចកអណ្ដែត
ឥតមានគោលដៅ រស់ព្រោះថ្ងៃស្អែក
សុំត្រឹមចំណែក បំពេញក្រពះ ។
សូមសំណូមពរ ដល់អ្នកមានអើយ
បើសុខសាន្តហើយ កុំភ្លេចធម៌ព្រះ
កុំអោយធ្វើខុស ព្រោះតែចង់ឈ្នះ
ជាតិមុខកម្មជះ តបវិញមិនខាន ។
អ្នកណា អ្នកណា អ្នកណា
អ្នកណា អ្នកណា អ្នកណា!
*******************
អ្នកណាធ្លាប់ក្បែរធ្លាប់ថែថ្នមចិត្ត
អ្នកណាធ្លាប់ស្និទ្ធធ្លាប់ថែកាយា
អ្នកណាចាប់ផ្ដើមបង្កើតស្នេហា
អ្នកណាប្រាថ្នារៀបការនឹងស្រី ?
អ្នកណាធ្លាប់ពោលថាស្នេហ៍លុះសូន្យ
អ្នកណាអោបអូនខ្សឹបប្រាប់ភក្ដី
អ្នកណាធ្លាប់ផ្ដាំថានឹងគ្មានថ្មី
អ្នកណាលកលៃរក្សាស្នេហា ?
អ្នកណាចេញទៅទាំងមិនស្រណោះ
អ្នកណាអ្នកស្មោះរង់ចាំសន្យា
អ្នកណាអ្នកឈឺហូទឹកនេត្រា
អ្នកណាខ្លោចផ្សារពេលបងចេញទៅ ?
សន្យាប្រយោលចោលទៅតាមខ្យល់
សន្យាអោយខ្វល់មើលមិនឃើញផ្លូវ
សន្យាសែនសមស្មានចិត្តមិនត្រូវ
សន្យាអោយពៅត្រឹមតែសន្យា ។
មុនិរាជ ធីតា